Powèm sila a se yon rivyè lanmou k ap koule nan yon kè ki ranpli ak mounite. Tèks sila a rakonte lanmou m pou peyi m, pou fanm peyi m, pou lanati. Tèks sila a se yon powèm lanmou ki plen ak entrig makònen ak lespwa m pou yon lòt Ayiti. Piblikasyon liv sa a se pou temwaye yon kote pratik nan diskou nou toujou pote sou ayisyanite an. Ayiti genyen yon vokasyon libète ak byennèt. Libète tanmen nan chwa lang lan. Byennèt la limenm tanmen lè nou aksepte tèt nou e kwè nou genyen yon wòl pou n kontinye jwe nan listwa limanite. Chak fwa yon moun chwazi ekri epi pibliye nan lang ayisyen an, se yon jarèt li bay libète. Tout lang enpòtan, men lang manman pi enpòtan pou fè literati, atizay ak lasyans - se pi bon zouti pou lakonesans donnen. Lang ayisyen an se nanm nanchon an, paske li pèmèt moun yo rete konekte ak sa yo ye tout bon vre.